Fellibylurinn Ida tók land síðdegis í gær. Fellibylurinn var þá fjórða stigs fellibylur en heldur dró úr afli hans eftir landtökuna og fór hann niður í þriðja stig og nú undir morgun niður í annað stig og fyrir skömmu niður í fyrsta stigs fellibyl. En það þýðir ekki að óveðrinu hafi slotað og allt sé yfirstaðið því enn er mikill vindur og úrkoma. 700.000 íbúar í Louisiana eru án rafmagns, þar af 400.000 þúsund í New Orleans.

Reiknað er með að enn fleiri muni verða fyrir áhrifum af fellibylnum eftir því sem hann færist inn í landið. Mikið eignatjón hefur nú þegar orðið og staðfest hefur verið að einn hafi látist af völdum fellibylsins eftir að tré féll á hús.

Joe Biden, Bandaríkjaforseti, sagði í gær að reikna megi með að vikur muni líða þar til búið verður að koma rafmagni á alls staðar.

Hætta er á að mikil úrkoma, flóð og mikil ölduhæð muni valda miklu tjóni í Louisiana og þar með New Orleans sem stendur mjög lágt. Flóðvarnargarðar hafa verið styrktir eftir að fellibylurinn Katrina orsakaði mikla eyðileggingu í New Orleans fyrir 16 árum en þá létust 1.800 manns.