Embætti varaforseta Bandaríkjanna er oft frekar rólegt, fá verkefni og varaforsetinn er oft innmúraður flokksmaður með takmarkaðan metnað. En með Kamala Harris, sem er varaforseti Joe Biden, er staðan allt önnur. Hún er metnaðarfull og tekur þátt í mörgum verkefnum en hins vegar nýtur hún ekki mikilla vinsælda.

Meðal verkefna hennar er að draga úr straumi innflytjenda og flóttamanna frá öðrum Ameríkuríkjum til Bandaríkjanna og helst eins fljótt og hægt er. Hún á að stýra endurbótum á kosningalöggjöfinni sem tryggir minnihlutahópum kosningarétt en minnihlutahópar eru mikilvægir stuðningshópar Demókrata. Repúblikanar í mörgum ríkjum hafa að undanförnu þrengt að kosningarétti þessara hópa og gert þeim erfitt fyrir með að kjósa en því ætla Demókratar að breyta.

Hún ber einnig pólitíska ábyrgð á bólusetningarherferðinni vegna COVID-19 og er í forsvari fyrir verkefni um að koma breiðbandi til fólks á landsbyggðinni. Hún á einnig að vera í forsvari við aðstoð við lítil og meðalstór fyrirtæki á meðan á heimsfaraldrinum stendur og er í forsvari fyrir metnaðarfulla geimferðaáætlun.

Harris er ekki bara fyrsta litaða manneskjan og konan til að gegna embætti varaforseta heldur er hún einnig á miðjum stjórnmálaferli sínum og vongóð um að verða forseti Bandaríkjanna dag einn.

Hún þarf þó að gera betur í að vinna hug og hjörtu landsmanna en i nýrri könnun Realclearpolitics sögðust 47,7% aðspurðra vera jákvæðir í hennar garð en 45,3% neikvæð. Til samanburðar má nefna að Joe Biden nýtur stuðnings 52,5% kjósenda en 42,5% eru neikvæðir í hans garð.