Merrick Garland, dómsmálaráðherra Bandaríkjanna, hefur ákveðið að stöðva aftökur á vegum alríkisins að sinni. Tíminn verður nýttur til að fara yfir verkferla í tengslum við dauðadóma og framkvæmd þeirra.

Garland segir að mikilvægt sé að tryggja að stjórnarskrárvarin réttindi hinna dæmdu séu virt og að þeir fái mannúðlega og réttláta meðferð.

Joe Biden, núverandi forseti, hefur lýst því yfir að hann sé mótfallinn dauðarefsingum og vilji afnema þær. En hann var hlynntur dauðarefsingum á árum áður og sem þingmaður kom hann að lagabreytingu 1994 þar sem 60 afbrotum var bætt á lista yfir þau afbrot sem geta leitt til dauðadóms.

Forveri hans í Hvíta húsinu, Donald Trump, lét hefja aftökur á nýjan leik í júlí á síðasta ári eftir að 17 ára hlé. 13 voru teknir af lífi á síðustu sex mánuðum Trump í Hvíta húsinu. Aftökurnar í forsetatíð hans voru fleiri en hjá nokkrum öðrum forseta síðustu 120 árin. 6 af þessum 13 aftökum fóru fram eftir forsetakosningarnar í nóvember. Sú síðasta tæpri viku áður en Trump lét af embætti.

Það er aðeins alríkisstjórnin sem gerir hlé á aftökum núna og því geta einstök ríki, þar sem dauðarefsing er í gildi, haldið þeim áfram. Dauðarefsing er í gildi í 28 ríkjum en mörg þeirra framfylgja ekki dauðadómum.