New York Times sagði í umfjöllun að stjórn Trump hafi reynt að komast að hver lak upplýsingum um tengsl kosningaframboðs Trump við Rússland. Dómsmálaráðuneytið hafi því skipað Apple og öðru ónafngreindu tæknifyrirtæki að afhenda gögn um pólitíska andstæðinga forsetans. Um svokölluð lýsigögn er að ræða en í þeim koma fram símanúmer og skráningar á símtölum og skilaboðum en ekki innihald þeirra. Blaðið segir að dómsmálaráðuneytið hafi einnig fyrirskipað Apple að halda þessu leyndu.
Demókratar eru ævareiðir eftir þessa afhjúpun. Adam Schiff, þingmaður, er annar þeirra þingmanna Demókrata sem segjast hafa fengið upplýsingar frá Apple um að dómsmálaráðuneytið hafi á árunum 2017 til 2021 krafist gagna um þingmennina. Hinn er Eric Swalwee en þeir eru báðir fulltrúar í leyniþjónustunefnd fulltrúadeildarinnar.
Svo virðist sem Trump og stjórn hans hafi verið að reyna að komast að hver lak upplýsingum um tengsl kosningabaráttu Trump við Rússa í kosningabaráttunni 2016. Ekki liggur fyrir hvort Trump hafi sjálfur beðið dómsmálaráðuneytið að rannsaka Schiff og Swalwell.
Á valdatíð Trump fékk dómsmálaráðuneytið afhent gögn um 100 manns að sögn Reuters sem segir að eftirlit og njósnir um þingmenn sé alvarlegt skref og krefjist mjög góðs rökstuðnings og samþykkis frá æðstu stöðum í ráðuneytinu.
Schiff segir að þetta sýni að stjórn Trump hafi verið í „veiðiferð“ og lýsir Trump sem „spilltum forseta“ sem hafi gert dómsmálaráðuneytið pólitískt. Hann sagði jafnframt að tilraunir stjórnar Trump til að fá upplýsingar um samskipti þingmannanna sé „ein hættulegast árásin á lýðræðið í Bandaríkjunum“ af hendi Trump.
Leiðtogar öldungadeildarinnar íhuga að sögn að kalla þá William Barr og Jeff Sessions, sem voru dómsmálaráðherrar í stjórn Trump, til að bera vitni fyrir dómsmálanefnd öldungadeildarinnar.
Sumir sérfræðingar segja að málið sé alvarlegasta dæmið um misbeitingu valds síðan Watergate-hneykslið kom upp á áttunda áratugnum.
