Á síðustu tveimur mánuðum hefur fjöldi daglegra smita, sjúkrahúsinnlagna og dauðsfalla dregist stöðugt saman. Þetta hefur orðið til þess að fjölmörg Evrópuríki hafa slakað á sóttvarnaaðgerðum.
„Í þessari viku hafa 36 af 53 ríkjum slakað á sóttvarnaaðgerðum vegna færri smita. Við sættum okkur við að þessar ákvarðanir séu teknar en um leið verðum við að viðurkenna að hættan er alls ekki liðin hjá,“ sagði Hans Kluge, svæðisstjóri WHO í Evrópu á fréttamannafundi í Kaupmannahöfn í gær.
Markmiðið með fréttamannafundinum var að senda skýr skilaboð til ríkisstjórna og almennings í Evrópu um að áfram verði að sýna aðgát. Sérstaklega núna þegar sumarleyfi eru að hefast af alvöru og fólk er meira á ferðinni og kemur saman í stórum hópum.
Fram kom að WHO hafi sérstakar áhyggjur af deltaafbrigði veirunnar sem er að sögn WHO meira smitandi en önnur afbrigði og hefur meiri mótstöðu gegn bóluefnum.
WHO óttast að þetta afbrigði muni verða ráðandi í Evrópu og muni gjósa upp af miklum þunga í sumar, álíka og gerðist síðasta sumar. Kluge sagði að þetta og sú staðreynd að enn er ekki búið að bólusetja fjölmarga Evrópubúa 60 ára og eldri gefi tilefni til að hafa áhyggjur.
Um 30% Evrópubúa hafa fengið einn skammt af bóluefni gegn COVID-19 og 17% hafa lokið bólusetningu.
„Þrátt fyrir að við séum langt komin þá erum við ekki komin nægilega langt. Verndin sem bólusetning veitir er víðs fjarri því að vera nægilega mikil til að vernda álfuna gegn því að faraldurinn blossi upp á nýjan leik. Það er enn langt í land með að 80% fullorðinna séu bólusettir eða hafi myndað ónæmi,“ sagði Kruge.
