Sala á smokkum hefur dregist saman frá því að heimsfaraldur kórónuveirunnar skall á með tilheyrandi sóttvarnaaðgerðum sem hafa óneitanlega dregið úr samneyti fólks við annað fólk. En nú eru Bandaríkjamenn að vakna til lífsins og farnir að stunda meira kynlíf en síðustu mánuði eða þá farnir að undirbúa það. Að minnsta kosti ef marka má sölu á smokkum en hún hefur tekið góðan kipp að undanförnu.

Ástæðan er að búið er að bólusetja tugi milljóna Bandaríkjamanna og byrjað er að slaka á sóttvarnaráðstöfunum og þar af leiðandi er fólk farið að hitta annað fólk í meira mæli en síðustu mánuði.

CNN segir að á fjögurra vikna tímabili, sem lauk 18. apríl, hafi smokkasala aukist um 23,4% miðað við sama tíma á síðasta ári. Seldust smokkar fyrir 37 milljónir dala á þessum fjórum vikum. Þetta er byggt á tölum frá markaðsfyrirtækinu IRI. Samkvæmt tölum IRI dróst smokkasala saman um 4,4% á síðasta ári miðað við 2019.

Reckitt Benckiser, framleiðandi Durex smokka, sagði í síðustu viku að sala fyrirtækisins hefði aukist um tveggja prósentustafa tölu á síðasta ársfjórðungi miðað við sama ársfjórðung 2020. Í heildina jókst sala fyrirtækisins á síðasta ári þrátt fyrir „áskoranir á fyrri helmingi þess“. Salan stóð í stað 2019 miðað við 2018. Fyrirtækið birtir ekki séruppgjör fyrir sölu á Durex en segir að söluaukninguna megi rekja til tilslakana á sóttvarnaaðgerðum.

Fulltrúar Wallgreen og CVS sögðu að sala á smokkum hafi aukist á síðustu vikum í verslunum keðjanna miðað við sama tíma 2020.