Ákvörðun ríkisstjórnarinnar er algjör stefnubreyting en hún hafði margoft lýst því yfir að útilokað væri að mæðurnar fengju að koma aftur til Danmerkur en hafði ekki útilokað að börnin fengju að koma ein síns liðs. Þessa stefnubreytingu skýrir ríkisstjórnin með að sérfræðinganefnd hafi komist að þeirri niðurstöðu að það sé meiri ógn við öryggi Danmerkur að láta konurnar dvelja áfram í Sýrlandi en að taka þær heim til Danmerkur.
Þessi stefnubreyting fer ekki vel í hægriflokkanna sem eru brjálaðir vegna málsins. „Okkur finnst þetta ekki lagi. Manni gæti dottið í hug að stuðningsflokkar ríkisstjórnarinnar hafi þrýst á hana um að breyta stefnu sinni. Af þeim sökum sé þessi dramatíska kúvending tilkomin,“ sagði Morten Dahlin, talsmaður Venstre, í samtali við TV2. Hann sagði jafnframt að það sé á ábyrgð ríkisstjórnarinnar að vígamenn verði fluttir til Danmerkur.
Peter Skaarup, talsmaður Danska þjóðarflokksins, sagðist vera á móti því að konurnar þrjár verði fluttar til Danmerkur. „Þetta er algjör kúvending hjá forsætisráðherranum í málefnum útlendinga. En það mátti búast við þessu þar sem jafnaðarmenn eru háðir öfgavinstriflokkum,“ sagði hann á Twitter í gær. Þar á hann við að SF, Enhedslisten og Radikale Venstre hafa þrýst mjög á ríkisstjórnina um að sækja konurnar og börn þeirra til Sýrlands en flokkarnir verja minnihlutastjórn jafnaðarmanna vantrausti.
Pernille Vermund, formaður Nye Borgerlige, sem er sá flokkur sem er lengst til hægri í litrófi danskra stjórnmála, tjáði sig um málið á Facebook í gær og sagði ákvörðunina „auðvirðilega og skammarlega“. „Mette Frederiksen setur meirihlutastuðning við ríkisstjórn sína ofar öryggi Dana. Það er ekki forsætisráðherra sæmandi að hegða sér svona auðvirðilega. Ég hafði vonast til að danskur forsætisráðherra myndi setja Dani í fyrsta sæti en ekki sjálfan sig,“ skrifaði hún.
Konservative, Íhaldsflokkurinn, segist styðja að börnin verði flutt til Danmerkur en ekki mæðurnar. Hjá Enhedslisten, SF og Radikale Venstre var ákvörðun ríkisstjórnarinnar fagnað.
Konurnar þrjár eiga samtals 14 börn. Að auki munu dönsk yfirvöld bjóðast til að flytja 5 börn þriggja annarra kvenna til Danmerkur. Þær hafa allar verið sviptar dönskum ríkisborgararétti en börn þeirra eru danskir ríkisborgarar. Það veltur því á mæðrum þeirra hvort þau fái að fara til Danmerkur.
Hvað varðar konurnar þrjár sem fá að koma til Danmerkur þá verða þær handteknar við komuna og síðan væntanlega ákærðar fyrir þátttöku í stríðinu í Sýrlandi, stríðsglæpi og aðild að hryðjuverkasamtökum.
