31 árs gamall breskur hjúkrunarfræðingur, Lucy Letby, gaf skýrslu fyrir dómara í dag en hún er ákærð fyrir morð á átta ungbörnum og tilraunir til að myrða tíu til viðbótar. Réttað verður í máli hennar á næsta ári.
Fjallað er um málið í mörgum breskum fjölmiðlum í dag.
Lucy er grunuð um að hafa myrt börnin er hún starfaði á Countess of Chester sjúkrahúsinu í Chester á Englandi. Hún lýsti hvorki yfir sakleysi né sekt við skýrslugjöfina í dag en mun svara þeirri spurningu síðar. Lucy var neitað um lausn gegn tryggingu og hefur því setið í gæsluvarðhaldi frá því hún var handtekin.
Börnin sem Lucy er sögð hafa myrt voru aðeins nokkurra daga gömul er þau týndu lífinu. Um var að ræða fimm drengi og þrjár stúlkur. Hún er einnig sökuð um að hafa reynt að myrða fimm drengi og sex stúlkur vil viðbótar. Atvikin áttu sér stað á árunum 2015-2016. Lucy var fyrst handtekin vegna málsins árið 2018, síðan aftur 2019, og loks aftur í fyrra, í tengslum við rannsókn á dauða barnanna sem hófst árið 2017. Hefur hún setið í gæsluvarðhaldi síðan í fyrra.
Ljóst er að réttarhöldin yfir Lucy Letby munu vekja mikla athygli enda eru glæpirnir sem hún er sökuð um ólýsanlega hryllilegir og hún lítur sannarlega ekki út fyrir að vera morðingi. Vinir hennar segja hana hafa helgað líf sitt starfi sínu sem hjúkrunarfræðingur og það hefði verið draumastarfið hennar.
