Þýska lögreglan handtók í gærkvöldi 51 árs konu vegna rannsóknar á dauða fjögurra sjúklinga á Oberlin-Klinik sjúkrahúsinu í Potsdam. Konan er grunuð um að hafa orðið fólkinu að bana. Einn sjúklingur til viðbótar er í lífshættu.

Bild segir að miklir áverkar hafi verið á fólkinu og beri þess merki að það hafi verið beitt „miklu ofbeldi“ og af þeim sökum telur lögreglan að um morð af yfirlögðu ráði hafi verið að ræða.

Í tilkynningu frá lögreglunni segir að fjórir sjúklingar hafi fundist látnir og sá fimmti alvarlega slasaður. Fólkið lá á nokkrum sjúkrastofum á sama gangi sjúkrahússins segir einnig í tilkynningunni.

Fréttir af málinu eru enn mjög óljósar en lögreglan fékk tilkynningu um það um klukkan 21 í gærkvöldi.