Verðið var ekki til að skemma fyrir en nóttin var verðlögð á sem nemur um 20.000 íslenskum krónum sem þykir ekki mikið í stórborginni. En það var eitt stórt vandamál við þetta allt saman.
Það var að á bak við auglýsinguna voru YouTube-hrekkjalómarnir Archie Manners og Josh Pieters. Þeir hafa nú birt myndband á YouTube þar sem fara yfir málið og segja áhorfendum að það sé nú ekkert lúxushús sem þeir auglýstu til leigu. Þetta er dúkkuhús!
New York Post hefur eftir þeim að þeir hafi viljað blekkja þá fjölmörgu Breta sem leita sér að íbúðum og húsum til leigu á Airbnb. „Okkur Archie datt í hug að auglýsa eitt minnsta hús heims á einni stærstu vefsíðu heims,“ sagði Pieters í samtali við New York Post.
Þeir fengu dúkkuhúsið hjá Emmu Watson, sem hannaði það og smíðaði. Það er allt hið glæsilegasta eins og sjá má á meðfylgjandi myndum og ljóst að smáatriðum hefur verið gefinn góður gaumur við hönnun þess og smíði. Þar eru bækur, blóm, málverk og ljósakrónur.
Það var móðir Pieters, Diane, sem tók að sér hlutverk leigusalans í auglýsingunni á Airbnb en hún var með fyrirsögninni „Lúxus hús frá nítjándu öld.“
Hrekkjalómarnir gerðu eitt og annað til að gefa í skyn að hér væri um dúkkuhús að ræða. Þeir komu til dæmis ekta vatnsflösku fyrir í einum ganginum og gjafakorti á stærð við greiðslukort á baðherberginu. Í einum speglanna sést síðan spegilmynd þeirra.
Airbnb samþykkti auglýsinguna og féll þar með í sömu gildru og fjölmargir aðrir. Á örskömmum tíma bárust bókanir fyrir sem svarar til um einnar milljónar íslenskra króna.
Félagarnir hafa nú fjarlægt auglýsinguna og taka sérstaklega fram að þeir hafi ekki fengið neitt greitt frá þeim sem vildu gjarnan leigja húsið.
