Þegar Bandaríkjamenn kusu sér forseta í nóvember á síðasta ári urðu þau tíðindi að Joe Biden sigraði í Arizona, sem hafði árum saman verið traust vígi Repúblikana, og það sama gerðist í Georgíu. Þetta fór illa í marga Repúblikana og hafa þeir að undanförnu unnið að því að koma í veg fyrir að svipaðir hluti gerist aftur í mikilvægum sveifluríkjum.

Mesta athygli hefur Georgía fengið en ekki er langt síðan þing ríkisins samþykkti lög sem gera fólki erfiðara fyrir að kjósa. Fáum dylst að lögunum er beint að svörtu fólki og fólki frá Suður-Ameríku og Mið-ameríku en það er yfirleitt stuðningsfólk Demókrata en Repúblikanar eru í meirihluta á þingi ríkisins.

Stacey Abrams, áhrifamesti Demókratinn í ríkinu, sagði í samtali við BBC að lögin væru „hneykslanleg“. „Á meðan FBI er á fullu að handtaka fólk sem reyndi að ræna völdum á grunni lyga um kosningarnar okkar, þá halda leiðtogar Repúblikana í ríkjunum áfram á meðvitaðan hátt að grafa undan lýðræðinu með því að færa sjálfum sér völd til að breyta kosninganiðurstöðum sem eru þeim ekki að skapi,“ sagði hún einnig.

Georgía er fyrsta ríkið sem fer þessa leið en öruggt er talið að fleiri muni fylgja í kjölfarið og skiptir þá litlu að áhrifamiklir Demókratar á borð við Abrams, Barack Obama og Joe Biden hafi mótmælt lagabreytingunum í Georgíu.

Í Arizona, Flórída og Texas vinna Repúblikanar nú að því að fara sömu leið og flokksbræður þeirra í Georgíu til að draga úr möguleikum kjósenda á að greiða atkvæði í framtíðinni. Skýring þeirra er yfirleitt að þetta geri þeir til að koma í veg fyrir kosningasvindl í framtíðinni en í því sambandi er rétt að hafa í huga að forseta- og þingkosningarnar í nóvember þóttu mjög öruggar.

Í Arizona hyggjast Repúblikanar afnema rétt kjósenda til að skrá sig á lista yfir þá sem fá kjörseðil sendan tímanlega með pósti. Í Flórída vinna Repúblikanar að því að hætt verði að nota „drop boxes“ en það eru kjörkassar sem hægt er að setja utankjörfundaatkvæði í fyrir sjálfan kjördaginn.

Í Texas eru Repúblikanar á leið með margvísleg lög til að styrkja stöðu sína. Þeir hafa miklar áhyggjur af auknum fjölda ungs fólks af innflytjendaættum í ríkinu en það þykir líklegra til að kjósa Demókrata en Repúblikana. Óttast Repúblikanar að ríkið muni verða ríki Demókrata með þessu áframhaldi en það hefur lengi verið traust vígi Repúblikana. Þeir hafa nú þegar samþykkt lög sem banna að kjörstaðir opni mjög snemma og einnig verður bannað að nota svokallaða „drive in“ kjörstaði eins og gert var í haust vegna heimsfaraldursins. Einnig þurfa þeir sem aka þremur eða fleiri á kjörstað að skrá sig og farþega sína áður.