Afbrigðið hefur um nokkurra vikna skeið vakið ótta á Indlandi þar sem ástandið af völdum heimsfaraldursins er mjög slæmt þessa dagana. Afbrigðið hefur nú borist til annarra landa, þar á meðal Bandaríkjanna, Þýskalands og Bretlands.
Samkvæmt tilkynningu sem indversk yfirvöld sendu frá sér á föstudaginn hefur hlutfall B1617 afbrigðisins aukist mjög mikið í PCR-sýnum að undanförnu. Indverskir fjölmiðlar segja að í byrjun mánaðarins hafi afbrigðið verið í meirihluta þeirra sýna sem voru tekin. Það er að sögn orðið mun algengara en breska afbrigðið B117.
„Það var næstum ekki til í desember en er nú á næstum öllum stöðum sem við skoðum,“ hefur Hindustan Times eftir Anurag Agarwal, forstjóra einnar af þeim rannsóknarstofum sem greina kórónuveirusýni. Hann sagði einnig að aukning stökkbreyttra afbrigða væri mikið áhyggjuefni.
B1617 afbrigðið kom fyrst fram á sjónarsviðið í Maharashtra þar sem núverandi bylgja faraldursins fór einna fyrst af stað.
Stökkbreytingarnar á B1617 eru L452R, sem hefur fundist áður, en hin E484Q er ný. Bresk heilbrigðisyfirvöld segja fullt tilefni til að fylgjast náið með þessu afbrigði en rúmlega 70 tilfelli hafi komið upp á England og nokkur í Skotlandi að sögn The Standard. Óttast er að þar sem tvöföld stökkbreyting hefur orðið í afbrigðinu geti það valdið vandræðum hvað varðar ónæmi og mótefni.
