Þetta kom fram á fundi yfirlækna fyrirtækisins með fulltrúum Bandarísku smitsjúkdómastofnunarinnar, CDC, í gærkvöldi.
Notkun bóluefnisins var stöðvuð á þriðjudaginn af FDA eftir að sex konur höfðu greinst með blóðtappa í heila eftir að hafa verið bólusettar. Einkennin eru þau sömu og hafa komið fram eftir notkun bóluefnis AstraZeneca. FDA er nú að rannska hugsanleg tengsl blóðtappanna við bóluefnið og sömu sögu er að segja frá Evrópu því Evrópska lyfjastofnunin, EMA, er einnig að rannsaka málið.
Búið er að bólusetja rúmlega sjö milljónir Bandaríkjamanna með bóluefni Johnson & Johnson. Sex konur hafa greinst með blóðtappa í kjölfar bólusetningar með bóluefninu og ein þeirra er dáin. Fjórar liggja enn á sjúkrahúsi. Þetta kom fram á fundi yfirlækna fyrirtækisins með fulltrúum CDC að sögn Boston Herald. Um er að ræða konur á aldrinum 18 til 59 ára. Sú sem lést var 45 ára.
Á fundinum í gærkvöldi sagði Aran Maree, yfirlæknir hjá Johnson & Johnson, að sjöunda tilfellið hafi uppgötvast en þörf sé á meiri upplýsingum um það. Það er einnig kona sem um ræðir í því tilfelli. Hann sagði að tvö tilfelli óvenjulegra blóðtappa í heila hafi komið fram í tilraunum fyrirtækisins með bóluefnið. CNN skýrir frá þessu. Bæði tilfellin komu fram á þriðja stigi tilrauna en um 44.000 sjálfboðaliðar tóku þátt í henni.
Annar sjúklinganna, 25 ára karlmaður, fékk bóluefnið og fékk blóðtappa átta dögum síðar. Hann fékk einnig innvortis blæðingar. Hinn sjúklingur var 24 ára kona en hún fékk blóðtappa 50 dögum eftir að hún var sprautuð. Hún var í hópnum sem fékk lyfleysu. Hún fékk ekki innvortis blæðingar. Bæði hafa nú náð sér.
Að fundi loknum í gærkvöldi ákvað CDC að bóluefnið verði ekki notað næstu vikuna að minnsta kosti, á meðan rannsókn heldur áfram.
