Á mánudaginn skýrði lögreglan síðan frá því að Gosney, sem er 29 ára, og James Hamilton, 42 ára unnusti hennar, hefðu logið. Washington Post skýrir frá þessu.
Fram kemur að Gosney hafði ekið yfir James í almenningsgarði nokkrum dögum áður þegar hún reyndi að skilja hann eftir þar og losa sig þannig við hann. Hún og Hamilton hentu síðan líki hans í Ohio River.
Gosney var handtekin, grunuð um morð, ósæmilega meðferð á líki og spillingu sakargagna. Hamilton var handtekinn, grunaður um ósæmilega meðferð á líki og spillingu sakargagna. Tvö önnur börn, sem bjuggu hjá parinu, hafa verið tekin í umsjá barnaverndaryfirvalda.
Málið hefur fengið mjög á íbúa þessa 48.000 manna samfélags og nágrannar og kennarar hafa syrgt lítinn dreng sem þótti glaðvær og skemmtilegur.
Lögreglan er litlu nær af hverju Gosney drap James en sagði á mánudaginn að hún sýndi engin merki iðrunar en hafi játað að hafa myrt hann. Lögreglan segir að hún hafi ekið með James og tvö önnur börn sín til Rush Run Park í Preble County á föstudaginn. Þar hafi hún reynt að skilja James eftir. Þegar hann reyndi að komast inn í bílinn hafi hún ekið yfir hann og yfirgefið garðinn. Hún hafi komið aftur um hálfri klukkustund síðan og komið að honum látnum. Hún setti þá líkið í bílinn og ók heim til Middletown. Daginn eftir óku hún og Hamilton að brú yfir Ohio River og hentu líki James í ána.
Á sunnudaginn komu þau síðan á lögreglustöðina til að tilkynna hvarf hans en lögregluna grunaði strax að eitthvað væri bogið við málið því þau sögðu að James hefði horfið á laugardaginn. Venjan væri sú að fólk færi strax að leita að börnum sínum ef þau týnast.
