Á síðasta ári keypti ónafngreindur aðili litla blá og hvíta skál á flóamarkaði í New Haven í Connecticut og greiddi 35 dollara fyrir en það svarar til um 4.500 króna. Skálin var nýlega seld á uppboði hjá Sotheby‘s og verður að segja að seljandinn hafi ávaxtað pund sitt vel, eða öllu heldur dollara því skálinn seldist á rúmlega 700.000 dollara eða sem svarar til um 90 milljóna íslenskra króna.

CNN skýrir frá þessu. Fram kemur að reiknað hafði verið með að skálin myndi seljast á 500.000 dollara en hún seldist á 721.800 dollar eða tæplega 29.000 sinnum hærra verði en seljandinn greiddi fyrir hana á síðasta ári.

Skálin er frá tímum Mingættarinnar í Kína. Sotheby‘s vill ekki skýra frá nafni seljandans en talsmaður fyrirtækisins sagði að hann hafi ekki einu sinni reynt að prútta um verð skálarinnar þegar hann fann hana á flóamarkaðinum. Fljótlega eftir kaupin sendi hann mynd af skálinni til Sotheby‘s sem áttuðu sig strax á að hér var um merkan grip að ræða.

Skálin var frá fimmtándu öld og þykir í ótrúlega góðu standi miðað við aldur. Aðeins er vitað um sex aðrar skálar eins og þessar í heiminum og eru þær flestar á söfnum.