Þegar kemur að afléttingu sóttvarnaaðgerða er stóra spurningin hvað er óhætt að opna og hvað á að vera lokað áfram. Skoðanir eru skiptar um þetta og ýmsir hagsmunir takast á, bæði heilsufarslegir og fjárhagslegir. Anthony Fauci, helsti smitsjúkdómasérfræðingur Bandaríkjanna og ráðgjafi Joe Biden, forseta, um aðgerðir gegn heimsfaraldrinum er ekki í neinum vafa um hvar fólk smitast einna helst af kórónuveirunni og að þeir staðir eigi að vera lokaðir.

Í umfjöllun BGR um málið kemur fram að Fauci ráðleggi fólki frá því að safnast saman innanhúss því mörg smit megi rekja til viðburða innanhúss. Hann gerði lista yfir níu staði sem hann telur mestu líkurnar á að fólk smitist af kórónuveirunni.  Þeir eru:

1.     Kvikmyndahús

2.     Veitingastaðir

3.     Líkamsræktarstöðvar

4.     Trúarathafnir

5.     Barir

6.     Ferðalög með strætisvögnum, flugvélum eða járnbrautarlestum

7.     Íþróttaviðburðir

8.     Samkomur á einkaheimilum

9.     Tónleikar

Að hans mati er rétt að forðast fyrrgreinda staði og samkomur þar til hjarðónæmi hefur náðst. Hann leggur einnig mikla áherslu á að fólk noti andlitsgrímur, virði fjarlægðarmörk og gæti vel að handþvotti.