Á sunnudaginn mættu mörg þúsund strangtrúaðir gyðingar í útför eins áhrifamesta rabbína landsins en hún fór fram í Jerúsalem. Þetta hefur kallað á hörð viðbrögð og mikla gagnrýni víða að úr þjóðfélaginu en á sunnudaginn voru strangar sóttvarnaaðgerðir framlengdar í þriðja sinn. Benny Gantz, varnarmálaráðherra, sagði að lögum væri ekki framfylgt á sama hátt og skipti þá greinilega máli hver á í hlut, þess vegna hafi strangtrúuðum gyðingum verið leyft að safnast saman í þúsunda tali.

„Milljónir fjölskyldna og barna eru innilokuð á heimilum sínum og fylgja reglunum á sama tíma og mörg þúsund strangtrúaðir safnast saman við útför,“ skrifaði hann á Twitter. „Annað hvort lokum við á alla eða opnum fyrir alla,“ bætti hann við. Hann benti einnig á að sárafáir hafi notað andlitsgrímur við útförina.

Ísraelsmenn eru komnir lengst allra þjóða við að bólusetja gegn kórónuveirunni en um þriðjungur þjóðarinnar, um þrjár milljónir hefur fengið fyrri skammtinn af bóluefninu og um 1,7 milljónir hafa fengið báða skammtana og hafa því lokið bólusetningu.