Á Svalbarða er hin svokallaða Dómsdagshvelfing sem er í raun fræbanki þar sem fræ frá öllum heimshornum eru geymd í miklum kulda. Hvelfingin er hugsuð sem trygging fyrir framtíð mannkynsins ef miklar hamfarir eiga sér stað hér á jörðinni. Er það meðal annars átt við kjarnorkuslys eða kjarnorkustríð, plöntusjúkdóma eða bara eitthvað allt annað.

Á næsta ári geta ferðamenn fræðst nánar um hvelfinguna sem heitir Global Seed Vault á ensku. Þeir fá þó ekki að valsa um þar innandyra heldur verður sérstakri ferðamannamiðstöð komið upp í Longyearbyen sem er stærsti bærinn á Spitsbergen sem er ein af Svalbarðaeyjunum. Dpa skýrir frá þessu.

Miðstöðin mun heita The Arc. Þar geta áhugasamir ferðamenn skoðað innihald Dómsdagshvelfingarinnar nánar en þar eru aðallega fræ.

Í The Arc verður einnig hluti af Arctic World Archives sem er stafrænn gagnabanki um „arf mannkyns“ en þessi gagnabanki er þannig hannaður að hann á að geta staðið nær allar hörmungar og hamfarir af sér.

Dómsdagshvelfingin er talin vera einn öruggasti staður heims enda á afskekktri eyju á milli Noregs og Grænland og höggvin inn í berg.