„Sumir hafa kallað þetta fjöldamorð en þetta er meira en það,“ sagði hún í október þegar hún ræddi um viðbrögð Trump og stjórnar hans við faraldrinum. Hún gagnrýndi forsetann fyrir að halda fjölmenna kosningafundi á sama tíma og smitum fór fjölgandi en hún túlkaði fjöldafundi forsetans sem tilraun til að ná hjarðónæmi með því að láta sem flesta smitast. „Ég vil gjarnan segja það skýrt og skorinort: Hjarðónæmi næst með bólusetningum – ekki með fjöldasmitaáætlun.“
Nú reynir á hvort hún geti gert betur en hún tók við sem forstjóri CDC, bandarísku smitsjúkdómastofnunarinnar, þann 20. janúar þegar Joe Biden tók við embætti forseta. Hún er því orðin lykilmanneskja í baráttunni gegn kórónuveirufaraldrinum.
Samkvæmt því sem vísindaritið The Lancet segir þá hóf Walensky feril sinn á Johns Hopkins í Baltimore. Þar sannfærðist hún um að hún ætti að sérhæfa sig í smitsjúkdómum. Sem læknanemi á tíunda áratugnum upplifði hún HIV-faraldurinn í návígi og horfði upp á fjölda fólks leggjast inn á sjúkrahús án þess að eiga mikla von um lækningu. „Á námsárunum lögðum við sex-sjö sjúklinga inn á hverju kvöldi, helmingur þeirra var var með HIV eða var að deyja úr AIDS,“ hefur The Lancet eftir henni.
En vísindamenn gerðu nýjar uppgötvanir og um miðjan tíunda áratuginn var hægt að byrja að gefa sjúklingum lyf sem gerðu að verkum að AIDS var ekki lengur dauðadómur. Allt frá þessum tíma hefur Walensky einbeitt sér að rannsóknum á smitsjúkdómum og baráttunni gegn þeim.
