„COVID-19 getur haft í för með sér að 2,4 milljónir barna deyi af völdum mislinga og lömunarveiki,“ sagði í fréttatilkynningunni. Einnig sagði að vegna heimsfaraldursins sýni þessir tveir bráðsmitandi sjúkdómar „nú aftur sitt ljóta andlit“.
Heilbrigðissérfræðingar um allan heim voru sama sinnis en nú er komið í ljós að þessar áhyggjur voru óþarfar. Fjöldi lömunarveikitilfella um allan heim hefur dregist svo mikið saman að jafnvel fagfólk, sem hefur tekið þátt í baráttunni gegn sjúkdómnum árum saman, á erfitt með að trúa eigin augum.
Sem betur fer er til bóluefni gegn lömunarveiki en ef svo væri ekki myndu mörg þúsund börn látast af völdum sjúkdómsins árlega. Samkvæmt nýjustu upplýsingum frá Alþjóðaheilbrigðismálastofnuninni WHO þá hafa aðeins Afganistan og Pakistan skráð tilfelli af lömunarveiki á þessu ári og þau eru örfá, það er hægt að telja þau á fingrum annarrar handar. Á síðustu árum hafa tilfellin verið 50 til 100 á ári í báðum þessum löndum en þau eru einu löndin þar sem sjúkdómurinn er landlægur.
Frá í ágúst hafa ekki fundist nein merki um lömunarveiki í sýnum sem voru tekin í skólpkerfum í báðum löndunum og það hefur vakið vonir um að sjúkdómurinn sé við að hverfa algjörlega af yfirborði jarðar. Aðeins einu sinni hefur WHO lýst því yfir að tekist hafi að útrýma sjúkdómi algjörlega en það var 1980 þegar bólusótt hafði verið útrýmt.
Í maí á síðasta ári lýsti WHO því yfir að tekist hefði að útrýma lömunarveiki í Afríku.
Sérfræðingar segja að aðalástæðan fyrir að lömunarveiki hafi ekki breiðst út að undanförnu sé að vegna heimsfaraldurs kórónuveirunnar sé fólk lítið á ferðinni og að félagsleg hegðun hafi breyst.
