Enn er margt á huldu um eiginleika Ómíkron afbrigðis kórónuveirunnar en það er nú á góðri leið með að verða ráðandi víða um heim. Sumir telja að afbrigðið eigi auðveldara með að komast fram hjá þeirri vörn sem bóluefni veita og sé enn meira smitandi en fyrri afbrigði veirunnar. En hvernig er best að hátta vörnum sínum gegn þessu afbrigði?

Svarið er í sjálfu sér ekki nein geimvísindi eða mjög flókið. Sífellt fleiri gögn benda til að andlitsgrímur séu besta vörnin, sérstaklega þær sem eru mjög þéttar. En auk þeirra skiptir það miklu máli að lofta vel og reglulega út úr húsum og halda góðri fjarlægð á milli fólk. Allt þetta dregur úr líkunum á smiti.

Niðurstöður nýrrar rannsóknar, sem hafa verið birtar í vísindaritinu PNAS sýna að ef þú ert óbólusett(ur) og ert í þriggja metra fjarlægð frá smituðum einstaklingi í óloftræstu herbergi þá eru nær 100% líkur á að þú smitist af veirunni innan nokkurra mínúta ef hvorugur aðilinn er með andlitsgrímu. Þetta byggist á því að hinn smitaði sé smitaður af Delta afbrigði veirunnar og mikið magn veiru sé í því lofti sem hann andar frá sér.

Ef báðir aðilar eru með venjulega ódýra andlitsgrímur (venjulega gerð I eða II (þessar bláu)) sem situr þétt að andlitinu þá geta verið allt að 10% líkur á að sá óbólusetti smitist á 20 mínútum.

Ef báðir aðilar eru með andlitsgrímur sem veita sérstaklega mikla vörn (FFP2 eða KN95) sem eru rétt staðsettar á andlitinu þá eru líkurnar á að smitast á 20 mínútum um 1/1000, sem sagt nær engar líkur.

Berlingske hefur eftir Eberhard Bodenschatz, rannsóknastjóra hjá Max Planck stofnuninni í Göttingen, að rannsóknin hafi leitt í ljós að smithættan sé gríðarlega mikil ef fólk notar ekki andlitsgrímur og sé orðin það eftir nokkrar mínútur, jafnvel þótt þrír metrar séu á milli fólks.

Andlitsgrímur eru því eitt besta vopnið gegn Ómíkron.