Sky News skýrir frá þessu. Fram kemur að lík hjónanna, sem voru fertug, og barna þeirra, 10 og 4 ára, hafi fundist á heimili þeirra í Koenig Wusterhausen, sem er nærri Berlín, á sunnudaginn. Skotsár voru á líkunum.
Lögreglunni barst tilkynning um að líflaust fólk væri í húsinu. Í kveðjubréfi, sem lögreglan fann, skrifaði maðurinn að hann hefði falsað bólusetningarvottorð fyrir eiginkonu sína og að vinnuveitandi hennar hefði komist að því.
Hjónin voru hrædd um að verða handtekin vegna þessa og að þau myndu missa forræðið yfir börnum sínum sagði Gernot Bantleton, saksóknari, í samtali við dpa fréttastofuna.
Lögreglan telur að maðurinn hafi myrt eiginkonu sína og börn og síðan tekið eigið líf.
Skammbyssa fannst í húsinu en ekki er vitað hvort það er byssan sem var notuð.
Þýsk stjórnvöld hafa hert sóttvarnaaðgerðir að undanförnu en fjórða bylgja heimsfaraldursins herjar nú á landið. Í síðustu viku var ákveðið að meina óbólusettu fólki um aðgang að flestum verslunum en það má fara í matvöruverslanir, apótek og aðrar verslanir sem selja nauðsynjavörur. Ný ríkisstjórn hefur í hyggju að gera bólusetningu gegn kórónuveirunni að skyldu frá og með febrúar.
