Víðast hvar um heiminn hefur fólk áttað sig á þeirri vá sem loftslagsbreytingarnar eru og reynir að verða minna háð olíu. Olíuríkið Sádí-Arabía er þar engin undantekning, að minnsta kosti ekki opinberlega.

Landið er stærsti olíuframleiðandi heims. Það hefur nú ákveðið að nota olíu við markaðssetningu landsins sem ferðamannastaðar. Nýlega var tilkynnt að reistur verði skemmtigarður þar sem olía verður í aðalhlutverki. CNN skýrir frá þessu.

Skemmtigarðurinn verður reistur á olíuborpalli sem er litlir 150.000 fermetrar. Skemmtigarðurinn hefur fengið nafnið „The Rig“ sem þýðir einfaldlega borpallur.

Pallurinn verður bæði skemmtigarður og staður til að fara í frí á. Þar verða þrjú hótel og 11 veitingastaðir. Þar verða einnig rússíbanar, teygjustökk og fallhlífarstökk.

Það er opinber fjárfestingasjóður landsins sem fjármagnar framkvæmdina sem er liður í þeirri áætlun að laða fleiri ferðamenn til landsins.

Milljónir ferðamanna koma árlega til landsins en það eru að stærstum hluta múslimar sem heimsækja hina heilögu borg Mekka. Ferðamenn frá Vesturlöndum eru ekki hversdagsleg sjón í landinu en það má líklega rekja til strangrar íslamskrar löggjafar landsins sem gengur þvert á það sem við á Vesturlöndum erum vön. Má þar nefna strangar reglur um réttindi og frelsi kvenna og almenn mannréttindi sem eru ekki í hávegum höfð í landinu.

Reiknað er með að „The Rig“ opni 2023.