Þetta var hræðilegt slys og þar sem Santiago var starfandi lögreglumaður mætti ætla að hann hafi vitað hvernig átti að bregðast við slysi af þessu tagi, hringja í neyðarlínuna og veita nauðsynlega aðstoð. En það gerði hann ekki. Hann og vinur hans virðast hafa misst stjórn á sér við slysið og ekki vitað hvað þeir áttu að gera. Þeir óku áfram og skildu lík Dymka eftir á vettvangi. En eftir smá tíma ákváðu þeir að snúa við og fara aftur á slysstaðinn að sögn lögreglunnar í Essex County.
Þegar þeir komu aftur á slysstaðinn tók ekki betra við hvað varðar ákvarðanatöku þeirra félaga því þeir ákváðu að setja lík Dymka í aftursæti bifreiðarinnar og aka heim til móður Santiago til að fá ráð hjá henni um hvað þeir ættu að gera. New York Times skýrir frá þessu.
Nokkrum klukkustundum síðar ók Santiago aftur á slysstaðinn og enn var líkið með í för. Í millitíðinni hringdi faðir hans, sem einnig er lögreglumaður, í neyðarlínuna og skýrði frá slysinu.
Þegar lögreglan í New Jersey kom á vettvang var lík Dymka enn í aftursæti bifreiðar Santiago.
Hann, móðir hans og vinur voru handtekin.
Santiago hefur verið kærður fyrir vítaverðan akstur, tilraun til að spilla sakargögnum og ósæmilega meðferð á líki. Móðir hans og vinur voru kærð fyrir ósæmilega meðferð á líki.
