Búið er að bólusetja um 75% þjóðarinnar en samt sem áður eru nú fleiri smitaðir af veirunni en á sama tíma á síðasta ári og það sama á við um sjúkrahúsinnlagnir, nú liggja fleiri COVID-19-sjúklingar á sjúkrahúsum en á sama tíma á síðasta ári.
Á mánudaginn greindust 1.981 smit en á sunnudaginn voru þau 1.457. Yfirlit frá smitsjúkdómastofnuninni sýnir að veiran herjar nú á alla aldurshópa og að óbólusett fólk fer síður í sýnatöku en bólusett.
Samkvæmt spá stofnunarinnar um þróun faraldursins á næstu vikum þá munu 2.000 til 4.500 smit greinast daglega í byrjun desember. Þetta er töluverð aukning frá síðustu spá sem gerði ráð fyrir 3.200 smitum að hámarki á dag. Það sama á við um innlagnir á sjúkrahús en í byrjun desember gerir stofnunin ráð fyrir að 60 til 160 COVID-19-sjúklingar verði lagðir inn á sjúkrahús daglega. Á mánudaginn voru 63 lagðir inn.
Tölurnar og spá smitsjúkdómastofnunarinnar hafa orðið til þess að margir sérfræðingar hvetja til þess að aftur verði farið að gera kröfur um notkun kórónupassa og að notkun andlitsgríma verði aftur gerð að skyldu á opinberum stöðum.
Jótlandspósturinn hefur eftir Eskild Petersen, prófessor í smitsjúkdómafræðum við Árósaháskóla, að ekkert bendi til að yfirvöld hafi stjórn á faraldrinum. Af þeim sökum eigi að byrja aftur að nota kórónupassann og andlitsgrímur. Meginmarkmiðið eigi að vera halda samfélaginu opnu, skólum, veitingastöðum, íþróttastarfsemi og vinnustöðum, og þetta sé væg aðferð til að tryggja að það sé hægt.
Fleiri sérfræðingar tóku undir orð Petersen og sögðu að tími sé til kominn að skoða að byrja aftur að gera kröfu um notkun kórónupassa og andlitsgríma.
