Í gær urðu þau dapurlegu tímamót í Þýskalandi að fjöldi látinna af völdum COVID-19 fór yfir 100.000 en 350 dauðsföll voru skráð í gær. Þess utan var smitmet sett en 79.051 greindist með smit og hafa aldrei verið fleiri á einum degi, fyrra metið var nokkurra daga gamalt en þá greindust um 69.000 smit.

Þetta kemur fram í tölum sem Robert Koch stofnunin, sem sér um samantekt á upplýsingum um heimsfaraldurinn í Þýskalandi, sendi frá sér í morgun. 83,8 milljónir búa í þessu fjölmennasta ríki ESB.

Þar hafa 100.119 látist af völdum COVID-19 en í heildina hafa 5,57 milljónir greinst með veiruna.

Heldur dró úr smitum í vor og sumar en frá því í byrjun október hefur þróunin bara verið á einn veg, upp og það hratt. Mörg sambandsríki hafa brugðist við þessu með því að grípa til sóttvarnaaðgerða.

Á mánudaginn sagði Jens Spahn, heilbrigðisráðherra, að áður enn en veturinn er liðinn verði flestir „bólusettir, búnir að jafna sig af smiti eða dánir“.

68% þjóðarinnar hafa lokið bólusetningu og um 2% hafa fengið einn skammt.

Þýskaland er ekki eina Evrópulandið sem hefur rofið 100.000 dánartölumúrinn því Frakkar hafa einnig rofið hann en í gær höfðu 118.653 dauðsföll verið skráð þar frá upphafi faraldursins. En Ítalir hafa einnig rofið þennan sorglega múr en þar hafa 133.330 látist.