Sjötugur Frakki varð fyrir árás bjarndýrs á laugardaginn þegar hann var á villisvínaveiðum í suðvesturhluta landsins. Björninn náði að rífa hluta af öðrum fæti mannsins af og skadda hluta af hinum fætinum. Maðurinn náði að skjóta tvisvar á bjarndýrið úr riffli sínum og drepa það. Hann liggur nú þungt haldinn á sjúkrahúsi.

Sky News skýrir frá þessu. Fram kemur að maðurinn hafi verið fluttur á sjúkrahús með þyrlu og sé í lífshættu.

Yfirvöld hafa hafið rannsókn á málinu en þessi atburður átti sér stað nærri Seix í Ariége síðdegis á laugardaginn.

La Depeche hefur eftir veiðimanni, sem var einnig á veiðum á þessum slóðum, að hann hafi ekki séð hvað gerðist en hafi heyrt neyðarkall í talstöðinni. „Björninn réðst á hann og greip um fótlegg hans. reif kálfann af og særði hann einnig á hinum fætinum. Það tókst að stöðva blæðinguna þar til hjálp barst,“ sagði maðurinn og bætti við að hann væri ekki hissa á að birnirnir kæmu sífellt nær byggð því það væri ekkert eftir fyrir þá að éta í fjöllunum.

Um brúnbjörn, birnu, var að ræða. Árásin hefur vakið upp umræður um aðgerðir yfirvalda til að koma upp stofni brúnbjarna í Pýrenafjöllunum á nýjan leik. Áætlunin hefur verið umdeild frá upphafi og telja bændur að búfénaði þeirra stafi ógn af björnunum. Á síðasta ári voru 64 birnir taldir í Pýrenafjöllunum.

Gagnrýnendur segja að samhliða því að björnunum fjölgi verði erfiðara fyrir þá að finna nægt æti og því leiti þeir neðar og komist í návígi við fólk.

Staðarfjölmiðlar segja að frá janúar og fram í október á þessu ári sé talið að birnir hafi drepið 625 kindur, 16 nautgripi, 17 hross og einn hund.