Það var dómstóll í Connecticut sem fann hann sekan um ærumeiðingar en það voru foreldrar barna, sem voru skotin til bana í Sandy Hook grunnskólanum fyrir níu árum, sem höfðuðu mál á hendur Jones. New York Times skýrir frá þessu.
20 börn, á aldrinum 6-7 ára, voru skotin til bana í skólanum auk 6 starfsmanna. Árásarmaðurinn var tvítugur. Þetta gerðist í desember 2012.
Jones hélt því fram árum saman að árásin hafi verið samsæri á vegum bandarískra yfirvalda sem hafi ætlað að nota hana sem ástæðu til að afvopna Bandaríkjamenn. Hann hélt því fram að syrgjandi fjölskyldurnar væru „leikarar“ sem væru hluti af samsærinu og að allt hefði þetta verið sett á svið af andstæðingum skotvopna og stóru fjölmiðlunum.
Hann deildi þessum samsæriskenningum sínum óspart á Infowars í hlaðvarpinu „The Alex Jones Show“.
Stórir miðlar á borð við YouTube hafa bannað allt efni frá Alex Jones og Infowars.
Fjölskyldur fórnarlambanna í Sandy Hook stefndu Jones fyrir ummæli hans en þau hafa valdið þeim miklum óþægindum, bæði andlega en einnig hefur fólkið sætt ofsóknum sumra þeirra sem hlusta á Jones og trúa öllu sem hann segir. Auk þess telja fjölskyldurnar að Jones hafi nýtt sér málið til að græða peninga. Jones hefur árum saman hafnað þessum ásökunum en hefur ekki getað lagt fram nein sönnunargögn sem styðja mál hans.
Hann viðurkenndi ekki sök en dómstóll í Connecticut sakfelldi hann þar sem hann hafði ekki afhent þau skjöl sem dómstólinn hafði beðið hann um. Að undanförnu hefur Jones borið því við að hann þjáist af geðsjúkdómi og það skýri ummæli hans.
Ekki hefur verið skorið úr um hversu háar bætur Jones á að greiða fjölskyldum fórnarlambanna.
Mál hefur einnig verið höfðað á hendur honum í Texas vegna ummæla hans um fjöldamorðið og þrír dómar hafa áður fallið honum í óhag í Texas í svipuðum málum.
Dómstólar í báðum ríkjum munu úrskurða um upphæð miskabóta á næsta ári.
