Daily Mail skýrir frá þessu. Eftir því sem Peng Shuai sagði þá varð hún fyrir kynferðisofbeldi af hálfu varaforsætisráðherrans fyrir þremur árum. „Þetta síðdegi veitti ég ekki samþykki og ég gat ekki hætt að gráta. Þú fórst með mig heim til þín og neyddir mig þess,“ skrifaði hún að sögn BBC sem var meðal þeirra fjölmiðla sem náðu að sjá færslu hennar áður en henni var eytt aðeins 20 mínútum eftir að hún var skrifuð. Kínversk yfirvöld fylgjast vel með Weibo og fjarlægja „óþægilegt“ efni fyrirvaralaust.
Peng Shuai sagði að þau hefðu fyrst hist fyrir rúmlega 10 árum og hafi þá tekið upp ástarsamband. Zhang Gaoli sleit sambandinu þó skömmu síðar en sjö árum síðar vildi hann aftur taka upp samband og bauð Peng Shuai því til Peking til að spila tennis og beitti hana síðan kynferðisofbeldi.
Í færslu sinni sagði Peng Shuai að hún hafi ekki neinar sannanir fyrir að hafa átt í sambandi við Zhang Gaoli, sem var og er kvæntur, sem vildi halda sambandinu leyndu.
#MeToo-mál hafa áður komið upp í Kína en þetta mál er talið vera hið fyrsta þar sem háttsettur meðlimur í kínversku kommúnistastjórninni kemur við sögu. Leta Hong Fincher, rithöfundur, sagði í samtali við Washington Post að málið geti verið „sprengja“ fyrir stjórn kommúnista. „Þetta er mjög eldfimt. Það er einmitt þess vegna sem kommúnistastjórnin telur femínistahreyfinguna vera ógn,“ sagði hún.
Ekkert hefur heyrst frá Peng Shuai og ekki er vitað hvar hún er en það þarf í sjálfu sér ekki að koma á óvart að hún sé horfin. Kommúnistastjórnin hefur áður sýnt að hún vílar ekki fyrir sér að ræna fólki og jafnvel láta það hverfa ef það er stjórninni ekki þóknanlegt.
