„Þetta er ekki grín og stundum heldur maður að það verði aldrei maður sjálfur,“ sagði Abigail Saldana í myndbandi sem hún birti á Instagram í október eftir að hún hafði fundið staðsetningarbúnað sem hafði verið komið fyrir í bíl hennar. Tólf dögum síðar var hún skotin til bana.

Lík hennar fannst í bíl hennar við hraðbraut í Texas. Nokkrum klukkustundum síðar var Stanley Szeliga, 54 ára fyrrum hermaður, handtekinn grunaður um morðið.

Málið hefur vakið töluverða athygli því margar viðvörunarbjöllur glumdu í aðdraganda þess. Abigail, sem var 22 ára einstæð móðir, hafði trúað vinnuveitanda sínum á Rick‘s Cabaret nektardansstaðnum fyrir því að óhugnanlegur viðskiptavinur, sem væri kallaður Stan, væri að elta hana og áreita. Hún sagði einnig ættingjum sínum frá þessu.

Á Instagramsíðu Stanley var mikið um færslur sem fjölluðu um Abigail. Þar sagði hann að hún væri vændiskona og að hann hefði greitt henni mörg þúsund dollara.

Ótti Abigail um eigið líf reyndist á rökum reistur því hún fannst látin undir stýri í bíl sínum þann 26. október. Hringt var í neyðarlínuna klukkan 20.40 og tilkynnt að silfurgrárri fólksbifreið hefði verið ekið greitt á hraðbrautinni áður en henni var beygt út af henni og út á grasbala nærri Fort Worth flugvellinum í Dallas. Tilkynnandinn sagðist hafa gengið að bifreiðinni og séð skotgöt á henni og manneskju sem hreyfði sig ekki og svaraði ekki. Þetta var Abigail sem var úrskurðuð látin á vettvangi.

Þrjú skotgöt vor á bifreiðinni og glerbrot úr henni fundust á nálægum gatnamótum og taldi lögreglan að þar hefði verið skotið á bifreiðina. Í bílnum fundust skilríki og vinnufatnaður Abigail og þar sem nektardansstaðurinn, þar sem hún starfaði, var í sjónmáli við gatnamótin fóru lögreglumenn þangað til að kanna hvort hún hefði starfað þar og fengu staðfest að svo væri en að hún hefði ekki verið í vinnu þennan dag. Framkvæmdastjórinn vakti athygli lögreglunnar á Stanley og sagði að hann hefði verið að áreita Abigail og að hún hefði verið hrædd við hann. Hann sýndi þeim upptökuna af Instagram þar sem hún skýrði frá staðsetningarbúnaðinum. Hann sýndi þeim einnig Instagramsíðu Stanley og færslur hans um Abigail.

Lögreglumenn höfðu uppi á Stanley og komust að því að hann ætti rauða Ford pallbifreið.  Myndir úr eftirlitsmyndavél nærri heimili Abigail sýndu síðan þessa bifreið elta bifreið hennar skömmu áður en hún var skotin.

Stanley var handtekinn daginn eftir morðið og hafði hann þá veitt sjálfum sér áverka á hnakka og andlit. Hann var fluttur á sjúkrahús og síðan á lögreglustöð. Hann var síðan úrskurðaður í gæsluvarðhald.