Það er óhætt að segja að Bretanum Mike Hall hafi brugðið illa í brún þegar nágranni hans hringdi í hann dag einn í ágúst. hann flutti Hall ekki nein gleðitíðindi því hann sagði honum að búið væri að selja húsið hans í Luton. Það eitt og sér er ekki í frásögur færandi nema fyrir það að Hall hafði alls ekki sett húsið á sölu.

BBC skýrir frá þessu. Hall starfar sem prestur í norðurhluta Wales, í um fjögurra klukkustunda akstursfjarlægð frá Luton. Það er því ekki óalgengt að hann sé fjarverandi frá Luton um langa hríð.

Hall flýtti sér heim og við heimkomuna komst hann ekki inn í húsið. Það var búið að skipta um skrá. Húsið var tómt og hann hitti mann sem hafði verið ráðinn til að taka lóðina í gegn. Þegar þarna var komið við sögu hafði Hall fengið nóg og hringdi í lögregluna.

Skömmu síðar kom iðnaðarmaðurinn aftur og nú var faðir „nýja húseigandans“ með í för. Hann sagði Hall að sonur hans hefði keypt húsið í júlí. Hann gat framvísað skjölum sem virtust vera í lagi og því komst lögreglan að þeirri niðurstöðu að hún gæti ekki gert meira fyrir Hall að sinni.

Fréttamenn BBC hafa skoðað málið og komist að þeirri niðurstöðu að húsið hafi verið selt án samþykkis Hall. Þeir telja að persónuupplýsingum hans hafi verið stolið og notaðar til að selja húsið. Seljandinn gaf sig að minnsta kosti út fyrir að vera Mike Hall og húsið var selt og gengið frá tilheyrandi pappírsvinnu.

Lögreglan vinnur nú að rannsókn málsins og fasteignasalinn hefur ekki viljað tjá sig um málið við fjölmiðla. BBC segir að húsið hafi verið selt fyrir sem svarar til um 25 milljóna íslenskra króna.