Nýlega hófst leit að göngumanni sem var talinn týndur á Mount Elbert í Colorado í Bandaríkjunum. Hann svaraði ekki ítrekuðum símhringingum leitarmanna því hann þekkti ekki númerið sem hringt var úr.

Þegar að maðurinn skilaði sér ekki á tilsettum tíma til byggða var tilkynnt að hann væri týndur. Var þá reynt að hringja ítrekað í hann og senda honum textaskilaboð en hann svaraði ekki.

Fimm leitarmenn voru sendir til leitar að manninum um tveimur klukkustundum eftir að tilkynnt var að hann væri týndur. Leitarhópurinn sneri aftur eftir fimm klukkustunda leit og hafði þá ekki fundið manninn á þeim svæðum þar sem þótti líklegt að hann væri.

Annar hópur var þá sendur til leitar og leitaði hans á svæðum þar sem göngumenn villast oft. En um tveimur klukkustundum síðar skilaði maðurinn sér til byggða.

Hann sagðist hafa villst þegar fór að kvölda og hafi gengið hvern stíginn á fætur öðrum til að reyna að finna réttu leiðina. Um sólarhring eftir að hann lagði af stað í ferðina fann hann bíl sinn.

Björgunarmenn segja að maðurinn hafi ekki haft neina hugmynd um að leit stæði yfir að honum.