Danska ríkisútvarpið fjallaði nýlega um þetta og leitaði skýringa á þessu. Mette Kroier, sálfræðingur og höfundur bókar um flughræðslu, sagði að þessi hræðsla komi frá stað í heilanum sem er ekki tengdur við skynsemi né minni. „Það er nákvæmlega ekkert rökrétt tengt þeim ótta sem flughrætt fólk finnur. Óttanum er stýrt af mjög frumstæðum hluta heilans sem sendir stöðugt skilaboð til líkamans sem segja: Við deyjum núna! Þetta breytist úr 0 í dauðaskelfingu á sekúndubroti,“ sagði hún.
Sá hluti heilans sem tekur yfir þegar flughræðslan gerir vart við sig er kallaður skriðdýraheilinn en hann hefur stýrt viðbrögðum okkar í milljónir ára. Hann hegðar sér aldrei rökrétt en sendir þess í stað aðvörunarmerki út til líkamans í gengum það sem er kallað sjálfvirka taugakerfið en eins og nafnið bendir til þá starfar þetta taugakerfi algjörlega sjálfvirkt.
Kroier sagði að það væri ekki undarlegt að líkaminn bregðist svona kröftulega við þegar skriðdýraheilinn sendir út boð. „Hormónið kortison og adrenalín myndast í miklu magni. Það segir líkamanum að hann sé að berjast fyrir lífi sínu og að þú verðir að slást, flýja eða þykjast vera dauður. Þetta virkar frábærlega ef þú þarft að flýja frá ljónum en gagnast ekki í flugvél í 10 kílómetra hæð,“ sagði hún.
Hún benti á nokkrar leiðir sem geta hugsanlega dregið úr spennunni á meðan á flugi stendur:
„Notaðu heyrnartól sem einangra vel fyrir utanaðkomandi hljóðum. Þannig lokar þú þig aðeins af. Mundu að hafa hljóðstyrkinn hátt stilltan.
Pantaðu sæti eins nærri miðju og hægt er. Ekki sitja við glugga þar sem þú getur alltaf verið að horfa út og séð hæðina, vængina og skýin.
Vertu með eitthvað til að horfa á á leiðinni. Þætti eða myndir sem heilla þig og fá þig til að gleyma þér. Það getur leitt hugann frá flugferðinni.
Borðaðu og drekktu eitthvað sem þér finnst gott. Það getur reynst sumum erfitt að koma einhverju niður en það hjálpar líkamanum að fá næringu og það getur sent endorfín, sem full þörf er á, út í líkamann. Mælt er með sykri.“
