Þetta segir í nýrri bók Stephanie Grisham, sem starfaði fyrir bæði Donald og Melaniu á meðan þau bjuggu í Hvíta húsinu. Bókin heitir „I‘ll Take Your Questions Now“. Washington Post hefur komist yfir eintak af henni og birti smá útdrátt úr henni.
Grisham segir að starfsmenn Secret Service hafi kallað Melania „Rapunzel“ sem er tilvísun í Rapunzel í ævintýrum Grimms bræðranna þar sem Rapunzel var lengi vel lokuð inni í turni en Melania var ekki mikið fyrir að yfirgefa Hvíta húsið og hélt sig mest heima við í forsetatíð eiginmannsins.
Grisham segir einnig að margir starfsmenn Secret Service hafi sóst sérstaklega eftir að vera í teyminu sem sá um öryggismál Melania því þá gátu þeir eytt meiri tíma með fjölskyldum sínum.
En það er einnig eitt og annað áhugavert sem kemur fram í bókinni. Grisham segir að forsetinn hafi reiðst mjög þegar Melania heimsótti flóttamannabúðir fyrir börn við landamærin Texas og Mexíkó. Þá var hún í jakka sem á stóð „I Really Don‘t Care, Do U“ (Mér stendur eiginlega á sama, en þér?). Þessi texti vakti mikla athygli. Grisham segir að Melania hafi verið reið yfir þeirri stöðu sem var komin upp vegna stefnu eiginmanns hennar í málefnum innflytjenda og hún hafi viljað skoða stöðuna með eigin augum. Hún segir að það sé þó enn hulin ráðgáta af hverju Melania ákvað að vera í umræddum jakka þegar hún heimsótti flóttamannabúðirnar. Þegar hún og Grisham komu aftur í Hvíta húsi beið starfsmaður þeirra og sagði að forsetinn vildi hitta Melaniu strax á skrifstofu sinni. Grisham segir að þetta hafi verið í fyrsta sinn sem forsetinn lét kalla Melaniu inn á skrifstofu til sín.
Þegar þangað var komið var forsetinn allt annað en sáttur og öskraði á þær og spurði: „Hvern fjandann voruð þið að hugsa?“
Hún segir að forsetinn hafi síðan fundið lausn á þessu og skrifað á Twitter að textanum á jakkanum hafi verið beint að „Fake News Media“.
