Bandaríkin hafa í hyggju að koma sér upp risastóru ratsjárkerfi sem getur séð hluti á stærð við fótbolta í 36.000 kílómetra fjarlægð úti í geimnum. Kerfið heitir Deep Space Advanced Radar Capability (DARC) en það á að geta fundið og varað við ógnum utan úr geimnum.

BBC skýrir frá þessu. Ekki er aðeins um ógnir sem stafa af loftsteinum og halastjörnum, því kerfið á einnig að fylgjast með geimvopnum og gervihnöttum annarra ríkja. Þrjár ratsjárstöðvar verða reistar á jörðu niðri til að þjónusta kerfið. Líklegt er talið að þær verði í Texas, Bretlandi og Ástralíu. Bretar eru að sögn mjög áhugasamir um að taka þátt í verkefninu og leggja til land undir ratsjárstöð. Reiknað er með að 15-20 gervihnattaloftnet verði sett upp við bresku stöðina og verður hvert þeirra um 15 metrar í þvermál.

Kerfið á einnig að fylgjast með geimrusli en það safnast sífellt meira fyrir af því á sporbraut um jörðina. Gervihnöttum og geimförum getur stafað hætta af þessu rusli.