Samkvæmt frétt Manchester Evening News sagði hún dómaranum að hún væri nýbúin að eignast barn þegar hún var fundin sek um að hafa falsað tímaskráningar sínar en hún starfaði hjá vinnumiðlun. Með þessu hafði hún fengið 7.700 pund greidd í laun, peninga sem hún hafði ekki unnið fyrir. Hún notaði hluta af peningunum til að kaupa kókaín.
Hún brast í grát þegar dómur var kveðinn upp yfir henni og sagðist vera nýbúin að eignast barn og að hún þyrfti að annast það. Hún sagðist jafnframt þjást af fæðingarþunglyndi og að hún hefði ekki sagt neinum frá því að hún væri barnshafandi. Lawton dæmdi hana því í skilorðsbundið fangelsi í stað óskilorðsbundins. „Ég vil ekki taka barnið þitt af þér,“ sagði hann þegar hann kvað dóminn upp í nóvember á síðasta ári.
Það komst hins vegar upp um lygi Heather þegar fjölmiðlar sögðu frá máli hennar. Í kjölfarið fékk lögreglan ábendingu og hóf rannsókn á því. Í fyrstu reyndi Heather að halda því að hún gæti staðfest að hún hefði eignast barn með því að leggja fram skírnarvottorð. En hún brotnaði síðan saman í yfirheyrslu og játaði lygina.
„Ég sagði þér að ég tryði orðum þínum því ég gat ekki ímyndað mér að neinn kæmi með svona hneykslanlega lygi,“ sagði Lawton þegar Heather kom fyrir réttinn í síðustu viku.
Hún hafði áður hlotið dóma 2011 og 2017 fyrir svipuð fjársvik.
