Til harðra átaka kom á milli mótmælenda, sem mótmæltu sóttvarnaaðgerðum yfirvalda, og lögreglu í Amsterdam og Eindhoven í Hollandi á sunnudaginn. Á laugardaginn var kveikt í sýnatökustöð þar sem kórónuveirusýni eru tekin.

Svo virðist sem óánægja með harðar sóttvarnaaðgerðir sé að brjótast út í aukinni hörku, ofbeldi og skemmdarverkum.

New York Times segir að svo virðist sem tveggja vikna útgöngubann, sem gildir frá 9 á kvöldin, hafi verið brotið margoft eftir að það tók gildi á laugardagskvöldið. Í þorpinu Urk, þar sem einnig kom til mótmæla og átaka í nóvember og desember, kveiktu ungmenni í sýnatökustöð skömmu eftir að útgöngubannið tók gildi.

Haft er eftir embættismönnum að 3.600 manns hafi verið sektaðir um allt land fyrir að hafa ekki farið eftir fyrirmælum um að halda sig heima og 25 voru handteknir fyrir að brjóta gegn útgöngubanninu eða fyrir þátttöku í ofbeldisverkum.

Á sunnudaginn tóku mörg hundruð manns þátt í óleyfilegum mótmælum í Amsterdam og Eindhoven en boðað hafði verið til þeirra á Facebook. Að auki var mótmælt víðar en það var í Amsterdam og Eindhoven sem kom til átaka við lögregluna. Kveikt var í bílum og reiðhjólum, rúður í verslunum brotnar og tugir voru handteknir. Lögreglan beitti vatnsbyssum, hestum og táragasi til að dreifa mótmælendum.

Mótmæli héldu áfram í gærkvöldi þar sem mótmælendur grýttu lögregluna og til átaka kom og voru um 150 handteknir.