Mikið ramakvein kvað við fyrr í mánuðinum þegar borgarstjórnin í höfuðborginni Seoul gaf út leiðbeiningar fyrir verðandi mæður. Þær innihéldu meðal annars góð ráð um hvernig þær eiga að sjá um að sinna öllum þörfum eiginmanna sinna á meðan þær ganga með börn undir belti. Þetta kveikti umræður um af hverju svo margar konur velja að eignast ekki börn. CNN skýrir frá þessu.
Konur eiga að gæta að þyngd sinni á meðgöngu með því að virða fyrir sér fötin sem þær klæddust áður en þær urðu barnshafandi. Þegar líður að fæðingu eiga þær að tryggja að nægilega mikið sé til að tilbúnum mat fyrir eiginmennina og af hreinum fötum til að þeir komist í gegnum nokkra daga án þeirra. Þetta var meðal þess sem kom fram í leiðbeiningunum.
Margar konur vilja brjótast undan hinni hefðbundnu kynjaskiptingu hvað varðar heimilisstörf og á atvinnumarkaði en það er erfitt þar sem hefðir ráða miklu og ákveða þær því oft að eignast ekki börn. Það spilar einnig inn í að leikskólar og önnur daggæslu úrræði þykja oft ekki góð og erfitt er að koma börnum þar inn. Þá er dýrt að eiga börn og barnabætur þykja ekki háar. „Það væri gaman að eiga börn og stofna fjölskyldu en eftir mikla sjálfsskoðun ákvað ég að gera það ekki. Það kallar á of miklar fórnir og þjáningar af minni hálfu. Þetta er leitt því ég elska börn en þau eru lúxus sem ég hef ekki efni á,“ hefur CNN eftir Yoo Nara, 37 ára íbúa í Seoul. Hún sagðist einnig óttast að ef hún gangi í hjónaband bíði hennar sömu örlög og móður hennar sem þurfti stanslaust að vera að sinna heimilisstörfum á meðan faðir hennar sat bara og gerði ekki neitt.
