Ruth og dóttir hennar, hin 4 ára Juliana, voru að gera sig klárar til að fara til Boston en þaðan ætluðu þær að fljúga til Los Angeles. Vinkona þeirra systkina, hin 46 ára Paige Packel, ætlaði með þeim til Boston en með annarri flugvél.
Ron var rétt kominn að World Trade Center þegar fyrri flugvélinni var flogið inn í einn turninn. Hann vissi ekki að í þeirri vél var Paige vinkona hans. „Ég vissi ekki hvað hafði gerst en skyndilega sá ég konu koma í gegnum rykskýið og hélt hún höndunum fyrir framan sig. Þegar ég kom nær sá ég að hún var illa brennd,“ segir hann í nýrri heimildarmyndaþáttaröð frá National Geographic, National Geographic – 9/11: One Day in America.
Konan hét Jeannieann Maffeo og var fertug einstæð móðir sem var á leið til vinnu og beið eftir strætisvagni utan við World Trade Center. Hún brenndist illa af flugvélaeldsneyti sem féll brennandi til jarðar. „Hún bað til guðs um að hún myndi ekki deyja: „Hjálpaðu mér. Ekki láta mig deyja. Hjálpaðu mér,“ sagði hún.
En ekkert björgunarfólk var á vettvangi sem gat hjálpað Ron og Jeannieann. Ron vissi að þau voru í bráðri lífshættu. „Ég hafði áhyggjur og fór inn á klósett og fyllti plastpoka af vatni sem ég notaði til að kæla hana,“ segir hann.
Líðan Jeannieann fór hratt versnandi og hún hafði áhyggjur af að hún myndi deyja áður en hún fengi hjálp. „Hún var kaþólsk eins og ég og við báðumst fyrir saman,“ segir Ron.
Skyndilega var hinni flugvélinni flogið á hinn turninn og nötraði og skalf anddyrið, þar sem þau höfðu leitað skjóls, harkalega við það. „Ég spurði Jeannieann hvort hún gæti hlaupið. Það gat hún. Síðan hlupum við saman yfir breiða götu og að svæði þar sem sjúkrabílar voru. Ég hallaði mér að henni og sagði henni að henni myndi takast þetta, að hún myndi sleppa lifandi frá þessu,“ segir Ron.
En þessi sannkallaði dagur Ron í helvíti var rétt að byrja. Þegar honum hafði tekist að komast heim til sín hringdi mágur hans, David, í hann og flutti honum þær hræðilegu fréttir að Ruth og Juliana hefðu verið í síðari vélinni sem var flogið á World Trade Center. „Ég féll niður á hnén og grét. Ég hafði verið að biðja bæn með Jeannieann við World Trade Center þegar síðari vélinni var flogið á turninn,“ segir hann.
Jeannieann lést 41 degi síðar á sjúkrahúsi í New York eftir harða baráttu.
Kennsl voru borin á lík Ruth í janúar 2002 en lík Juliana fannst ekki.
„Það voru mjög sérstakt fólk sem var drepið þennan dag. Heimur minn varð aldrei sá sami,“ segir Ron.
