CNN skýrir frá þessu. Tonga er þekkt fyrir aðlaðandi strendur og sól en þrátt fyrir að það kunni að heilla marga ferðamenn þá er 18 mánaða dvöl kannski fullmikið af því góða, sérstaklega ef dvölin er gegn vilja ferðamannsins eins og er í tilfelli Zoe. „Það eru ekki margir sem þekkja sjálfir hvernig það er að vera fastur á eyju án vina eða fjölskyldu, í landi sem þú ætlaðir ekki að vera í,“ sagði hún í samtali við CNN.
„Eða að komast ekki til landsins sem maður býr í, að geta ekki komist heim. Að vera hræddur við að snúa aftur til ættjarðarinnar því þar er undarleg veira. Þetta er ansi mikil einangrun,“ sagði hún einnig.
Það að hún býr í Kína hefur gert henni erfitt fyrir með að komast heim því Kínverjar halda uppi ströngum sóttvarnaaðgerðum hvað varðar komur útlendinga til landsins og skiptir þá engu þótt Zoe búi í Kína. Þess utan var gripið til harðra sóttvarnaaðgerða á Tonga þegar heimsfaraldurinn blossaði upp og lagðist nær allt flug þangað af um tíma.
Zoe hefur nú beðið þar í 18 mánuði og vonað að hún fari að komast heim til Kína og af þeim sökum hefur hún ekki þorað að yfirgefa Tonga og fara eitthvað annað. Hún játaði þó í samtali við CNN að hún sé nú búin að gefa þá von upp á bátinn um að komast til Kína vegna sóttvarnaaðgerða þar í landi. „Ég veit að Kína verður lokað um langa hríð,“ sagði hún.
