Heimsfaraldur kórónuveirunnar hefur haft margvísleg áhrif um allan heim. Meðal þessara áhrifa er að fjölmargir hafa fengið sér hund, líklega vegna þess að fólk hefur þurft að vera heima löngum stundum vegna sóttvarnareglna. En þessi mikli hundaáhugi hefur kynt undir nýrri tegund glæpa í Bretlandi. Þjófnaði á gæludýrum, aðallega hundum.

2019 og 2020 fjölgaði kærum vegna stolinna gæludýra um 170% Í Bretlandi miðað við árin á undan. Fá þessara mála hafa endað með ákærum.

The Guardian segir að samtökin Blue Cross vari nú hundaeigendur við vegna þessa faraldurs.

Samtökin hvetja hundaeigendur til að setja örflögur í hunda sína, halda sig á ákveðnum göngustígum þegar þeir viðra þá og ekki birta myndir af þeim á samfélagsmiðlum.

The Guardian segir að þjófarnir steli yfirleitt hundum í hverfum velstæðra en þar fara þeir inn í garða og lokka hundana til sín með góðgæti.  

Heimsfaraldurinn hefur valdið því að verð á hundum hefur hækkað mikið í Bretlandi. Verð á hreinræktuðum hvolpum hefur fjórfaldast síðan heimsfaraldurinn skall á og er nú að sögn hægt að selja þá á sem nemur allt að 1,4 milljónum íslenskra króna.