Líkurnar á að loftsteinninn Bennu lendi í árekstri við jörðina eru meiri en áður var talið. Áður var talið að líkurnar á árekstri næstu 200 árin væru 1 á móti 2.700 en nú eru þær 1 á móti 1.750. Þetta er tilkomið vegna nýrrar vitneskju vísindamanna um loftsteininn eftir að geimfarið Osiris-Rex fylgdist með honum í um þrjú ár. Bennu er talinn einn hættulegasti loftsteinninn í sólkerfinu þegar kemur að líkunum á árekstri við jörðina.

Osiris-Rex hefur fylgst með og rannsakað Bennu síðan 2018 en er nú á leið aftur til jarðar með steina og ryk af loftsteininum og er geimfarið væntanlegt til jarðar 2023. Sky News skýrir frá þessu.

Fram kemur að ferðin hafi veitt vísindamönnum nýjar upplýsingar og meiri skilning á ferðum loftsteinsins næstu aldirnar. 24. september 2182 er nú dagur þar sem jörðinni getur stafað mikil hætta af Bennu. Davide Farnocchia, hjá Near Earth Object Studies miðstöð bandarísku geimferðastofnunarinnar NASA, segir að litlar líkur séu á að Bennu lendi í árekstri við jörðina á næstu öld og því eigi fólk ekki að hafa of miklar áhyggjur af því.