Heilbrigðisyfirvöld segja að á síðustu dögum hafi rúmlega 25.000 smit greinst daglega og hafa þau ekki verið fleiri í fimm mánuði. Þetta er tíföldun miðað við tölur frá í maí. Skotland, North West, North East og Yorkshire and The Humber eru þau svæði þar sem flest smit hafa greinst að undanförnu.
Góðu tíðindin í þessu eru að dauðsföllum af völdum veirunnar hefur ekki fjölgað að sama skapi en þau eru um 20 á dag og hafa verið það í um þrjá mánuði.
Bretland er eitt þeirra Evrópuríkja sem hefur farið verst út úr faraldrinum. Þegar smitin voru í hámarki í lok janúar greindust rúmlega 60.000 smit á sólarhring. Ekki er langt í að heildarfjöldi smitaðra í landinu nái fimm milljónum. Um 128.000 manns hafa látist af völdum COVID-19.
Harðar sóttvarnaaðgerðir hafa verið í gildi í landinu og enn þarf fólk að nota andlitsgrímur í almenningssamgöngufarartækjum, í verslunum, á söfnum og öðrum stöðum þar sem erfitt er að halda góðri fjarlægð á milli fólks.
Ríkisstjórnin stefndi að því að taka síðasta skrefið í áætlun um afléttingu sóttvarna þann 21. júní síðastliðinn en því var slegið á frest til 19. júlí. Ríkisstjórnin er nú í ákveðinni klemmu því atvinnulífið krefst þess að öllum hömlum verði aflétt hið snarasta en margir vísindamenn telja að vegna fjölgunar smita að undanförnu sé ekki hægt að slaka á sóttvarnaaðgerðum.
James Naismith, forstjóri Rosalind Franklin Institute í Oxford, sagði í samtali við The Guardian að Bretland takist nú á við þriðju bylgju faraldursins. „Deltaafbrigðið breiðist út þrátt fyrir smitrakningu, sýnatökur, sóttvarnaaðgerðir og notkun andlitsgríma. Við munum öll smitast af Deltaafbrigðinu nema við séum heppin eða förum ótrúlega varlega,“ sagði hann.
