Deltaafbrigðið hefur nú þegar fundist í 98 löndum og reiknað er með að innan fárra mánaða verði það útbreiddasta afbrigði veirunnar um allan heim. „Deltaafbrigðið breiðist hratt út, í löndum þar sem margir hafa verið bólusettir og í löndum þar sem fáir hafa verið bólusettir,“ sagði Tedros Adhanom Ghebreyesus, forstjóri WHO.
Afbrigðið kom fyrst fram á sjónarsviðið á Indlandi í árslok 2020. Það hefur síðan náð stöðu þess afbrigðis sem mest kveður að. Það byrjaði að berast til annarra landa í upphafi árs og í febrúar voru fyrstu tilfelli þess skráð í Bretlandi og Bandaríkjunum. Síðan hefur afbrigðið borist víða og hefur nú fundist í tæplega 100 löndum. Víða hefur það nánst rutt öðrum afbrigðum veirunnar af borðinu og er hið ráðandi afbrigði.
India Today segir að 67% allra smita á Indlandi séu af völdum Deltaafbrigðisins. Í Singapúr er hlutfallið 95%, í Bretlandi 93%, í Indónesíu 90% og í Rússlandi 87%.
WHO segir að Deltaafbrigðið sé svo öflugt og duglegt við að stökkbreyta sér að það ógni allri heimsbyggðinni, einnig ríku löndunum þar sem bólusetningar eru vel á veg komnar.
Í löndum þar sem fáir hafa verið bólusettir eru hryllilegar myndir af yfirfullum sjúkrahúsum nú aftur orðnar daglegt brauð. Ghebreyesus segir að ekkert land sé öruggt fyrir Deltaafbrigðinu og hvetur ríku löndin til að senda fleiri bóluefni til fátæku landanna, það er að hans mati besti möguleiki alþjóðasamfélagsins til að ná tökum á heimsfaraldrinum. Hann hvetur til þess að gripið verið til alþjóðlegrar bólusetningaáætlunar til skamms tíma þar sem tryggt verður að 10% íbúa í hverju landi verði bólusettur. Þessar bólusetningar eiga að ná til fólks í áhættuhópum og heilbrigðisstarfsfólks. WHO segir að þetta muni stöðva faraldurinn og bjarga mörg þúsund mannslífum. Til langs tíma litið segir WHO að markmiðið sé að auka útbreiðslu bóluefna enn frekar. „Ég hef hvatt leiðtoga heimsins til að tryggja að eftir eitt ár verði búið að bólusetja 70% íbúa í öllum löndum heims,“ segir Ghebreyesus.
