Nú virðist sem aðeins sé farið að draga úr þeim mikla hita sem hefur legið yfir norðvesturríkjum Bandaríkjanna og suðvesturhluta Kanada að undanförnu með tilheyrandi hitametum. Yfirvöld hvetja íbúa þó til að halda árvekni sinni vegna hættu á skógareldum og segja að hitinn geti jafnvel hækkað á nýjan leik.

Víða í Washingtonríki og Oregon fór hitinn yfir 47 gráður nokkra daga í röð. Í Lytton í Bresku Kólumbíu í Kanada var hitamet slegið þrjá daga í röð og fór hitinn hæst í 49,7 gráður á þriðjudaginn en það er hæsti hiti sem hefur mælst í Kanada. Bærinn hefur nú orðið skógareldum að bráð og er nær brunninn til grunna.

Margir létust af völdum hins mikla hita í Bresku Kólumbíu. Frá síðasta föstudegi fram á mánudag létust 486 manns í ríkinu en það er um 320 fleiri en látast að meðaltali á fjórum dögum. Yfirvöld telja að stór hluti þessa fjölda hafi látist af völdum hita.

Í Bandaríkjunum telja yfirvöld einnig að hitinn hafi orðið mörgum að bana.