„Er í bíl með ókunnugum manni. Vona að mér hafi ekki verið rænt,“ svona hljóðuðu skilaboð sem Catherine Serou, 34 ára, sendi móður sinni. Hún stundaði nám í háskólanum í Lobachevsky í Rússlandi en sjálf var hún frá Bandríkjunum.

CNN segir að Serou hafi verið á leið frá heimili sínu á snyrtistofu. Hún hvarf skömmu eftir að hún yfirgaf heimili sitt. Hún fékk far með ókunnugum manni og skömmu síðar sendi hún fyrrgreind skilaboð til móður sinnar.

Lík hennar fannst á laugardaginn í skóglendi utan við Rekhino. 43 ára karlmaður var handtekinn skömmu síðar. BBC segir að hann eigi langan og alvarlegan afbrotaferil að baki. Hann hefur verið úrskurðaður í gæsluvarðhald til 15. ágúst.

Serou flutti til Rússland fyrir tveimur árum eftir að hún hafði gegn herþjónustu í Afganistan. Hún var í daglegu sambandi við fjölskyldu sína í Mississippi.

NPR hefur eftir móður hennar, Beccy Serou, að hún hafi verið í vinnunni þegar hún fékk skilaboðin frá dóttur sinni og hafi því ekki séð þau fyrr en 40 mínútum síðar. Þá náði hún ekki sambandi við hana. Hún sagðist telja að dóttir hennar hafi húkkað sér far í stað þess að bíða eftir leigubíl og að hún hafi verið myrt um klukkustund eftir að hún settist upp í bílinn hjá manninum.

Þjóðvarðliðar, lögreglumenn og sjálfboðaliðar leituðu að Serou í fjóra daga á því svæði þar sem farsími hennar tengdist síðast farsímasendi. Lík hennar fannst síðasta laugardag.