Þetta kemur fram í fréttatilkynningu frá danska heilbrigðisráðuneytinu. Bólusetningar hófust fyrir um fimm mánuðum nú er búið að bjóða flestum 50 ára og eldri upp á bólusetningu. Nú er byrjað að bólusetja yngri hópa, allt niður í 16 ára.
Í fréttatilkynningunni er haft eftir Magnus Heunicke, heilbrigðisráðherra, að kannanir hafi sýnt að Danir séu mjög fúsir til að láta bólusetja sig og að það gleðji hann að sjá að það séu ekki bara orðin tóm.
Búið er að bjóða níu hópum upp á bólusetningu og hafa 94,9% þeirra sem stóð bólusetning til boða þegið boðið.
Nú hafa rúmlega 2,2 milljónir Dana fengið að minnsta kosti einn skammt af bóluefni eða 37,7% af íbúafjöldanum. Tæplega 1,3 milljónir hafa lokið bólusetningu eða 22,1% af íbúafjöldanum.
Fram kemur að líklega muni hlutfall þeirra sem láta bólusetja sig lækka aðeins nú þegar röðin kemur að yngri aldurshópunum en kannanir sýna að eftir því sem fólk er eldra, þeim mun líklegra er það til að láta bólusetja sig. Um 80% Dana á aldrinum 18 til 39 ára segist ætla að láta bólusetja sig.
