Greene líkt kröfunni um notkun andlitsgrímna við hvernig nasistar neyddu gyðinga til að bera svokallaðar gyðingastjörnur á bringunni. Hún var gagnrýnd fyrir þessi ummæli sín en það hélt ekki aftur af henni nokkrum dögum síðar þegar hún líkti fyrirætlunum bandarískrar verslunarkeðju um að gera kröfu um að viðskiptavinir sýni bólusetningarvottorð, þegar þeir koma í verslanir keðjunnar, á sama hátt.
„Marjorie hefur rangt fyrir sér og ákvörðun hennar um að líkja hryllingi Helfararinnar við það að nota andlitsgrímu er viðbjóðsleg. Helförin er það versta sem hefur verið gert í sögunni. Ég vil taka skýrt og greinilega fram að þingmenn Repúblikana í fulltrúadeildinni fordæma þessi ummæli,“ segir í yfirlýsingu frá Kevin McCarthy, leiðtoga Repúblikana í fulltrúadeildinni.
Mitch McConnell, leiðtogi Repúblikana í öldungadeildinni, var einnig ósáttur við ummæli Greene. „Þetta er eitt af fjölmörgum köstum hennar sem eru ekkert annað en hneykslanleg og viðbjóðsleg,“ sagði hann. McConnell hefur áður lýst yfir óánægju sinni með Greene. Í febrúar sagði hann ummæli hennar vera krabbameinsæxli í Repúblikanaflokknum.
Greene hefur verið iðin við að dreifa samsæriskenningum, bæði áður en hún var kjörin á þing og eftir það. Hún hefur meðal annars dreift samsæriskenningum um að bandarísk stjórnvöld hafi staðið á bak við hryðjuverkaárásirnar á Bandaríkin í september 2001 og að margar skotárásir í skólum hafi verið sviðsettar. Hún er einnig þekkt sem dyggur stuðningsmaður Donald Trump, fyrrum forseta.
