Lögin hafa verið gagnrýnd fyrir að eftir sex vikna meðgöngu vita margar konur ekki að þær eru barnshafandi. Einnig hefur verið harðlega gagnrýnt að engar undaþágur eru á banninu og skiptir þá engu þótt nauðgun eða sifjaspell hafi komið við sögu.
Lögin opna einnig fyrir þann möguleika að almennir borgarar geta höfðað mál á hendur læknum sem annast fóstureyðingar eða á hendur sérhverjum þeim sem aðstoðar konu við að fá fóstureyðingu.
„Þessi lög eru þau öfgafyllstu í landinu og skapa hættulegt fordæmi,“ segir Alexis McGill Johnson, formaður Planned Parenthood Action Fund. „Aðgengi að fóstureyðingum hefur aldrei verið ógnað jafn mikið,“ segir hún einnig.
Með samþykkt laganna bættist Texas í hóp ríkja, þar sem Repúblikanar fara með völd, þar sem reglur um fóstureyðingar eru hertar og miðað við þann tíma þar sem hægt er að heyra hjartslátt fósturs. Það gerist yfirleitt eftir um sex vikna meðgöngu en þá vita margar konur ekki að þær séu barnshafandi.
Álíka lög, sem hafa verið samþykkt í öðrum ríkjum, hafa verið úrskurðuð ólögmæt af dómstólum því þau ganga gegn úrskurði hæstaréttar frá 1973 í „Roe vs. Wade“ málinu en með úrskurði sínum þá ákvað hæstiréttur að fóstureyðingar væru löglegar í öllu landinu.
Til dæmis hafa dómstólar úrskurðað lög í Mississippi, sem banna fóstureyðingar eftir 15 vikna meðgöngu, ólögleg. Hæstiréttur hefur nú ákveðið að taka það mál fyrir en á tveimur lægri dómstigum hafa lögin verið úrskurðuð ógild. Þetta er fyrsta málið, sem snýst um fóstureyðingar, sem hæstiréttur tekur fyrir eftir að Donald Trump útnefndi nýja íhaldssama dómara í réttinn. Málið verður tekið fyrir í haust.
