Fyrir nokkrum dögum hefði Madeleine McCann orðið 18 ára ef hún væri enn á lífi en það telur lögreglan útilokað. Henni var rænt úr íbúð fjölskyldunnar þegar hún var í sumarleyfi í Portúgal í byrjun maí 2007.  Foreldrar hennar hafa þó ekki gefið upp alla von og hafa haldið fast í vonina um að sjá hana aftur á lífi. En nú hefur þýska lögreglan gert út af við veika von foreldranna um að þau muni sjá Madeleine aftur á lífi.

Hans Christian Wolters, saksóknari, stýrir rannsókn þýsku lögreglunnar á máli Madeleine en þýska lögreglan telur að þekktur þýskur barnaníðingur hafi orðið Madeleine að bana. Samkvæmt frétt Daily Mail þá sagði Wolters nýlega að Madeleine hefði verið myrt í Portúgal fljótlega eftir að henni var rænt.

Wolters stýrir rannsókn þýsku lögreglunnar sem miðar að því að afla nægilegra sönnunargagna gegn Christian Brueckner, 44 ára, sem er grunaður um að hafa numið Madeleine á brott og myrt hana.

Ummælin um að Madeleine hafði verið myrt í Portúgal komu þegar hann var spurður hvar hann telji að morðið hafi átt sér stað. „Í Portúgal. Ég er bjartsýnn á að við náum að leysa þetta mál,“ sagði hann.

Fyrir nokkrum dögum sögðust McCann-hjónin vonast til að sjá Madeleine aftur á líf en það gerðu þau þegar þau birtu afmæliskveðju til hennar.

Wolters sagðist reikna með að í lok sumars verði hægt að gefa út ákæru á hendur Brueckner fyrir morðið á Madeleine. Hann afplánar nú dóm í Þýskalandi fyrir fíkniefnabrot og nauðgun. Hann hefur legið undir grun síðan í júní á síðasta ári.

Þýska lögreglan hefur ekki viljað skýra í smáatriðum af hverju hún er svo sannfærð um að Brueckner hafi myrt Madeleine. Þó er vitað að þessi sannfæring byggist ekki á réttarmeinafræðilegum gögnum.